Sydsamiska / Åarjelsaemien
Mijjieh MTM:sne gærjah darjobe jïh gærjide dutnjien löönebe mejtie gïerve trygkesovveme tjaalegh lohkedh dan gaavhtan dov funksjovneheaptoe. Vuesiehtimmiej gaavhtan:
- lohkeme- jïh tjaelemetsagkesh
• tjelmehts jallh tjelmiebielehts
• jeatjah fysihken funksjovneheaptojne, vuesiehtimmien gaavhtan svihtjemeheaptojne jallh bieljehts jïh bieljiebielehts
• intellektuellen funkesjovneheaptojne
• neuropsykiatrijen funksjovneheaptojne, goh autisme, adhd.
• annjebodts funksjovneheaptojne skïemtjelassen jallh skaaran åvteste
Gellie almetjh sveerjengïele mubpiengïeline sijhtieh håalemegærjah sveerjengïelesne jïh jeatjah gïeline lohkedh. Men ajve almetjh mejtie gïerve trygkesovveme tjaalegh lohkedh funksjovneheaptoen gaavhtan åadtjoeh håalemegærjah löönedh.
Mij lea håalemegærjah?
Håalemegærjah sjïere njoelkedassen mietie Upphovsrättalaakesne dorjesuvvieh. Dah leah reegkes gïeline lohkeme sjïere dutnjien mejtie gïerve trygkesovveme tjaalegh lohkedh funksjovneheaptoen gaavhtan. Naan mijjen håalemegærjijste dovne håaleme jïh teekste. Daej gærjine maahtah teekstem jïh guvvieh vuejnedh datovren jallh mobilen skjeermesne mearan goltelh.
Håalemegærja löönedh
Gaajhkh gærjagåetine Sveerjesne maahtah håalemegærjah löönedh. Datne gærjide cd-skivesne, usb-mojhtesisnie jallh mojhtesekåarhtesne löönh. Ih naan vihtiestimmiem daarpesjh, nuekies jis soptsesh datne håalemegærjide daarpesjh. Eejnegen namhtah dejtie löönedh. Gihtjh barkijh gærjagåetesne, dah gujht datnem viehkiehtieh.
Håalemegærjah veedtjedh
Datne maahtah gærjide ryöktesth mijjen digitaale katalogeste Legimus veedtjedh. Dov gærjagåetie datnem viehkehte åtnoenommem jïh tjeakoesbaakoem åadtjodh jïh dutnjien vuesehte guktie daam darjodh.
Håalemegærjah lohkedh
Datne maahtah håalemegærjah ovmessie vuekine lohkedh, sjïere håalemegærjaspïeline, datoresne, mobiltelefonesne jallh surfepleahtjosne.
Datne mijjen appem, man nomme Legimus, utnedh jis edtjh mobiltelefonesne jallh surfepleahtjosne lohkedh. Dïhte aaj namhtah. Datne appen sïjse loggedh kontojne maam gærjagåetesne åådtjeme.
Tsiehkietjaalemegærjah
Maehtede aaj tsiehkietjaalemegærjah gelline gïeline mijjeste löönedh. Gaskesadth mijjiem jis sïjhth tsiehkietjaalemelöönijem sjïdtedh.
Mah gærjah gååvnesieh löönedh?
Legimus:esne maahtah vuejnedh mah håalemegærjah jïh tsiehkietjaalemegærjah gååvnesieh löönedh. Daesnie aaj gaavnh gærjah jeatjah hammojne. Mijjieh maehtebe aaj datnem viehkiehtidh gærjah jeatjah laantijste löönedh.
Legimus gååvnese www.legimus.se